4月17日朝早九點，插咗胃喉，嗰一刻，胃喉成為我人生最討厭嘅嘢。姑娘話等排咗隊照CT，無耐就照完，直接轉咗外科病房。
晏晝三點幾，
有個醫生A入嚟同我講：「CT照到大腸中尾段有舊大腫瘤塞住咗，腸頭到腫瘤都腫哂，腸頭都有粒嘢，未知係瘜肉定腫瘤。依家有兩個做法：一、淨係切咗最大粒腫瘤，但腸太腫，前後兩段接駁唔返，要造口。同時間腸頭粒嘢都有機會變癌症嘅機會都好高；二、切哂佢，淨係切剩淨返無腫嘅部分，駁小腸。係我最建議嘅做法。手術最理想係安排聽日朝早做。你會想做邊個？」
「切哂。我可唔可以打電話畀屋企人嚟聽？」
我內心心諗咩料，一嚟就同我講聽日要做手術，出去搵私家Seek second opinion穩陣。
屋企人嚟到，同醫生傾，好婉轉同佢講話想出去睇私家。
醫生A話：「私院好參差個喎！留得喺公院嘅未必一定係差，有留喺到嘅原因……唔係唔得，出面可能大把人勁過我，但出去都係要排好耐，要考慮下病人仲頂唔頂到。」
呢一刻，唔知你心諗嘅同我一唔一樣。比佢股自信/理所當然震懾到，但又感到有股安心。個下決定留喺到做了。
下一秒，佢就畀咗同意書我寫話：「你真係要出去做先再取消啦，但我依家幫你Book咗個期先。」
醫生一走，我就開始喊了，我爸爸都喊了，一切都太快了。
一萬個點解，
點解明明我九月第一次入醫院就講我腸胃有問題，中間經手過咁多醫生，今日先同到我講係可能係大腸癌？
點解我要係無攞組織化驗，唔知係咪癌，唔知自己係咪連氏綜合症下做手術，仲要切7-8成大腸？
點解係我？
嗰日我以為我會失眠，但身體原來已經好攰，頂唔住了。
下一日先更TVB
Comments