4月20日，術後D2，發覺內科病房同外科病房差好遠，內科成個感覺溫暖好多，啲護士都溫柔好為你個心情著想，有陣時你扭下計，佢哋都會錫住你，不過就亂啲雜啲，多MI/demanding(即係我)；外科嘅護士會Chop chop啲，sharp啲，畢竟做嘅每一個Movement 都會影響到病人嘅康復，亦有規律好多，就無內科嘅彈性。
不過作為喺內科呢個溫床打躉咁耐嘅病人，上到外科真係好唔慣，啲助理姐姐可能見你後後生生，好似正正常常，以為淨係做咗個細手術，又未必會就住你。
因為坐床成日會Sir咗落嚟，啲姐姐移返我去床頭，嗰一下成為咗我到依家仲驚緊嘅陰影，痛到我以為做咗第二次手術，佢哋見我咁就話：「你啱啱撳嗎啡止痛啊嘛！」，大佬你迅雷不及掩耳就移，我撳鬼咩。所以之後每一次有人想幫我郁，我都好抗拒。
晏啲有姐姐出於善意話幫我，整返條褲，我拒絕咗，姐姐大聲講咗一句：「唉，幾始號床唔畀掂！」我個心理壓力升到一個值一下嗎啡嘅程度（講笑
同時，胃喉又引流咗好多嘢出嚟，我心都知，胃喉無咁快可以拆，有種失望油然而生。心真係好攰，我好想轉私家，FF緊去私院啲護士會就住我，唔會好似趕每個鐘嘅Schedule當我公仔咁撚。
我對我住緊嘅呢間醫院不滿又升高咗，加上對自己地域性好強，又認床，又對陌生地方不安感好大，又適應唔到醫院生活，漸漸開始有一舊無形嘅石頭壓咗喺我上面。
我嗰日就問我老豆我可唔可以用自己錢轉私家。
佢探病時間個陣同我講，我做完大手術，加上Case複雜，出去好難有院收，同好難遇到醫A咁好嘅醫生，又貴。
但我都聽唔入耳，轉院好似成為我唯一嘅出口。
Comments