4月21日，術後D3，一早姑娘就交更，派藥。而我朝早多人嘅時候先瞓得著，但未慣住院嘅生活令我每次只可以瞓到10分鐘到半個鐘。
「畀個手帶我啊。」喚醒咗我，伸手。
「嘟。」因為未食得嘢，所以所有嘢都係要吊，個姑娘做好哂準備工作，突然間佢轉身走咗。我就見住本身應該輸入我身滴咗落床同地下，我默不作聲。一嚟我真係好討厭一開口，未聽你嘅需求已經畀人閪面。二嚟我怕佢係排啲水嘅氣先咁做。
過咗陣，醫生巡房同我講：「我開咗現階段輸液最強嘅止痛藥畀你㗎啦。」
佢抬頭見到枝止痛藥話就係呢枝，但佢無低頭見到我張濕哂嘅床單同地下，我只可以講：「嗯，明白。」，我都唔想開口好似督個姑娘灰咁。同時間，我又忍唔住諗，點解我可以畀人忽略到呢個地步，忽略到一個要做手術嘅地步，忽略我啱啱做完手術就要逼我郁，逼我坐，忽略到幫張床止痛都唔幫我止痛。個腦開始諗唔明了，荒謬到塞咗。
算啦。
Depression score:10/100(忽略感)
晏啲有人過嚟輸血，我心諗唔係掹下又一條掹下又一條，D3先又輸血即係唔樂觀？蛋白質，鹽水，嗎啡，輸血，坐低三粒痘，封住左右手。尿喉，鼻喉，引流。心電圖，血壓計，血氧儀。仲要泵腳。四條水，三條喉，三條電線，再綁腳，好似一件無形嘅束縛衣著咗係我到。
都算啦。
Depression score:20/100(迷惘)
要抽血唔知係星期日定點，無血姑嚟，派咗個醫生，三針，右手玩到左手。
再有熱心姑娘話要幫我黐返胃喉新嘅鼻貼，無留夠位，黐完個拉力將我無嗰鼻哥窿封咗，作為一個完全嘅鼻呼吸者同脫水狀態嘅人，真係唔想打開個口透氣。
真心，係輪流玩鳩我？
Depression score:25/100(不甘)
探訪時間，我又哭得像個孩子，又嬲到係咁鬧。好難接受到又無咗咁多嘢，仲要畀人咁對待。
我成日話抑鬱好似螞蟻嘅死亡漩渦咁，個訊息素一錯，你就好難逆轉。唔係一句簡單「睇開啲啦」「唔好唔開心啦」「你走出嚟咪得」就出到嚟。因為已經搵唔到領頭嘅個隻螞蟻。
而呢一刻，屬於我嘅死亡漩渦亦逐漸形成。
Comments