4月19日，術後D1，我第一日已經清醒咗了，只係傷口忍忍痛。因為係第一次做大手術，唔知要幾耐先可以好得返，以為自己係天選之人，可以個零星期出得院。
醫生A朝早嚟同我講手術：「嗱，手術好艱難咁完成。」
我心諗係咪擴散得好嚴重呢？所以咁講
醫生A：「手術好艱難咁以微創做咗，因為要攞出嚟嘅嘢成十幾CM，所以就算微創傷口都有返十零CM。咁就因為黐住咗少少腸同少少胃，所以都切咗少少。都成功做到無造口嘅。」
我聽完內心好似突然去咗陽光與海灘再捲起咗龍卷風咁。傷口咁細？唔係要由胃開到落肚底咩？傷口仲細過我隻手？咁Kaisin？切咗腸同胃，即係擴散到去定點。
然而，最後我只係用一個傻貓般嘅樣，呆咗望住醫生，講咗句「知道，可唔可以同我屋企人講。」
醫生A：「好啊，你老豆好似喺ICU啊，我落去同佢講。」
佢落到去之後同我老豆講多一次，發生咗咩事，而我老豆只係喺醫生講嘢之前講咗一句：「醫生，我麻醉藥未過，依家迷迷哋，不過我盡量記啦。」
至於點醫生A點解知我老豆喺ICU仍然係我哋家族嘅不解之迷。
同一日，好多唔同科咗嘅姑娘嚟睇我，痛症科，物理治療，好多好多，Overwhelm 咗我。一日裹面休息時間其實唔係話好多，隔一陣又量血壓，一陣又量體溫，一陣又要抽換片。不過最離譜嘅係佢哋要我第一日Sit out，即係出嚟坐，我係張床係咁典都痛，可以點坐？
但我傻傻嘅我仲好樂觀，當時插住一條腹腔引流，一條尿喉，一條胃喉，打緊包靜脈營養液同好多好多嘅輸液。我個陣諗掹下又一條掹下又一條，個零星期差唔多出到院啦。
呢日我就沉沉睡下去，但正因對康復嘅唔理解同錯誤嘅盼望，為未來嘅事件埋下伏筆。
Comments